O Concello do Pereiro de Aguiar acolle o 9 de xullo, ás 21.00 horas, no Auditorio dos Gozos, a proxección do documental 360 Curvas, dentro da programación do Ciclo Mestre Mateo.
A obra ten unha duración de 80 minutos e está cualificada como non recomendada para menores de 7 anos. Trátase dun documental que pon o foco no territorio, na memoria e na loita pola supervivencia dun lugar marcado pola distancia, a montaña e o paso do tempo.
360 Curvas foi finalista na categoría de documental nos Premios Mestre Mateo, destacando como unha proposta audiovisual que retrata unha realidade próxima e profundamente ligada ao rural galego.
A película parte das 360 curvas que separan A Fonsagrada de Lugo, un camiño longo, difícil e descendente entre montañas. Ese percorrido serve como metáfora do declive dun lugar que, a comezos dos anos 90, decidiu resistir e loitar pola súa supervivencia.
Esta proxección forma parte da programación do Ciclo Mestre Mateo no Pereiro, unha iniciativa que achega ao municipio diferentes propostas do audiovisual galego durante o mes de xullo.
Dende o Concello do Pereiro de Aguiar convidamos á veciñanza a asistir a esta nova cita co cinema galego e a descubrir unha obra que fala de territorio, identidade e resistencia.
Consulta tamén a programación completa das proxeccións do Ciclo Mestre Mateo no Pereiro.
Source link
