Allariz acolle a vindeira fin de semana a XXX Feira de Outono, os días 7 e 8 de novembro de 2026, no Pavillón do IES de Allariz, nunha cita xa máis que consolidada no calendario outonal da comarca. O evento abrirá as súas portas sábado e domingo en horario continuado de 10:30 a 20:00 horas, ofrecendo un completo punto de encontro con cociña en vivo, degustacións, postos de venda de produtos locais e de tempada, ademais de obradoiros infantís e saídas ao monte.
A programación aposta de cheo polos sabores propios desta época, como o mel, as noces, as castañas, os cogomelos e a repostería artesanal, recoñecendo o traballo diario das persoas produtoras e artesás da zona. No espazo gastronómico destaca a presenza de cociñeiros de primeiro nivel: o sábado ás 12:00 h será a quenda de Gerson Iglesias cunha demostración de cociña de outono, mentres que o domingo á mesma hora tomará a testemuña Javier Diz.
A axenda inclúe tamén as tradicionais saídas micolóxicas guiadas polo experto José Gómez Bragaña, do Centro de Investigación Forestal de Lourizán, con saída dende o propio pavillón do IES. Pola súa banda, os máis pequenos poderán participar nos obradoiros infantís programados (o sábado da man de Xeitura e o domingo con actividades de marcapáxinas a cargo de As Curuxas), pensados para nenas e nenos de entre 6 e 12 anos. As prazas para estas actividades son limitadas e requiren de inscrición previa a través da web.
A concelleira de Promoción Económica, María López, destacou que «o consumo de produto local e de tempada é a mellor garantía de sostibilidade e calidade. Con esta feira queremos achegar á veciñanza e as persoas visitantes o traballo excelente das nosas produtoras e produtores, impulsando ao mesmo tempo a nosa economía de proximidade». Pola súa banda, a técnica de Promoción Económica Eva Sampedro sinalou que chegar a esta trixésima edición «demostra a vixencia dunha cita imprescindible para nós despois de trinta edicións».
Como cada ano, a feira tamén contará cos agardados sorteos dos Premios de Outono, previstos para o sábado ás 20:00 horas e o domingo ás 14:00 e 19:30 horas, con lotes de produtos e cestas outonais para as persoas asistentes que estean presentes no recinto.
Organizada polo Concello de Allariz coa colaboración da Reserva de Biosfera Area Allariz, a Feira de Outono volve a poñer en valor a riqueza do produto local e o compromiso co sostible. Pódense consultar todos os detalles en https://www.allariz.gal/feira-de-outono/
Source link
